MAKAA ya Mawe Ruvuma yaingiza bilioni 400 na kutoa ajira 700

Posted on: November 2nd, 2020

MADINI ya makaa ya mawe yanayochimbwa mkoani Ruvuma yameingiza zaidi ya shilingi bilioni 400 na kutengeneza ajira za watanzania zaidi ya 700.

Mkuu wa Mkoa wa Ruvuma Christina Mndeme amesema kiasi hicho  cha fedha kimepatikana kutokana na mauzo ya madini ya makaa ya mawe zaidi ya tani milioni  3.3 ambayo yameuzwa kuanzia Agosti 2017 hadi Oktoba 2020.

Amesema uchimbaji wa madini ya makaa ya mawe unafanyika katika wilaya za Songea ,Mbinga na Nyasa na kwamba Mkoa wa Ruvuma una hazina kubwa ya mashapo ya madini ya makaa ya mawe yaliyofanyiwa utafiti na kampuni tatu kubwa za uchimbaji.

“Kwa mujibu wa utafiti huo,Mkoa wa Ruvuma una mashapo ya makaa ya mawe zaidi ya tani  milioni 457,mashapo hayo tulionayo,tunaweza kufanya uchimbaji kwa miaka 718 bila kumaliza hazina hii’’,amesema Mndeme.

Hata hivyo Mndeme amesema katika kipindi cha mwaka 2019/2020  zaidi ya tani 636,000 za makaa ya mawe ziliuzwa ndani na nje ya nchi.

Amesema Mkoa wa Ruvuma umebarikiwa kuwa na madini ya aina mbalimbali yakiwemo madini ya vito na dhahabu ambayo yanachimbwa kwa wingi katika wilaya za Tunduru,Songea ,Mbinga na Nyasa.

Mndeme amesema madini ya vito na dhahabu kuanzia Mei 2019  Mkoa ulianzisha masoko ya madini katika wilaya za Tunduru na Songea ambapo hadi sasa zimeuzwa gramu zaidi ya milioni moja zenye thamani ya zaidi ya shilingi bilioni saba 7.7 na kwamba watanzania  zaidi ya 1000 wamepata ajira kwenye za uchimbaji  wa madini hayo.

Amesema Mkoa wa Ruvuma umejenga kituo cha umahiri wa madini ambacho kitawawezesha wachimbaji kupata elimu ya uchimbaji na utambuzi wa madini hayo.

Imeandikwa na Albano Midelo

Afisa Habari Mkoa wa Ruvuma

Novemba 2,2020