HALMASHAURI zitenge maeneo ya wakulima na wafugaji

Posted on: September 15th, 2022

MKOA wa Ruvuma umeweka mikakati ya kuzuia migogoro ya wakulima na wafugaji na watumiaji wengine wa ardhi.

Afisa Mifugo wa Mkoa wa Ruvuma Nelson  William amesema Halmashauri za Wilaya za Mkoa wa Ruvuma kwa kushirikiana na chama cha wafugaji (CCWT) waone umuhimu wa kufanya Sensa ya Mifugo.

Amesema mikakati hiyo ikiwemo  kutambua wafugaji na mifugo iliyopo katika kila kijiji ili kujua takwimu sahihi  ya mifugo  katika upangaji wa mipango ya  ardhi,miundombinu ya mifugo  na huduma za jamii.

Hata hivyo amesema Halmashauri za Wilaya za Mkoa wa Ruvuma zione uwezekano wa kufanya utaratibu wa kuwatengea wafugaji  eneo la kuchungia  katika vijiji vilivyoainishwa  kwaajili ya ufugaji  na kuwekewa mipaka ya kudumu.

“Kila Halmashauri ione umuhimu wa kuwaelimisha na kuwahamasisha wafugaji  juu ya umuhimu wa utoaji  wa takwimu  sahihi za mifugo”.

Wiliam amesema Wafugaji na wakulima walio katika maeneo yasiyo rasmi mfano hifadhi ya misitu  ya Muhuwesi,Sasawala na Ushoroba wa Kilimasera waondoke kwa hiari waende katika maeneo yatakayoruhusiwa kuchungia.

“Halmashauri zione uwezekano wa kukamilisha mipango ya matumizi bora ya ardhi kwa vijijivyenye wafugaji,wahamiaji wakulima wazawa  na watumiaji wengine”.

Amesema Halmashauri za Mkoa zione umuhimu wa kushirikiana na asasi zingine kwa mfano MVIWATA,RUCODIA,PASS,pamoja na wadau wenginewa maendeleo na makundi ya wafugaji ,chama cha wafugaji  katika zoezi la uandaaji wa mipango  ya matumizi bora ya ardhi.

Imeandaliwa na Aneth Ndonde

Kutoka Kitengo cha Mawasiliano Serikalini Ofisi ya Mkuu wa Mkoa wa Ruvuma